ޕާކިސްތާނުގެ އިރުމަތީ ސަރަހައްދުތަކަށް ގިނަ ދުވަސްތަކެއް ވަންދެން ބޯކޮށް ވާރޭވެހި ކޯރުތައް ފުރިގެން ބަންޑުންވުމާ ގުޅިގެން ފެންބޮޑުވެ، ގާތްގަނޑަކަށް ބައި މިލިއަނެއްހާ މީހުންގެ ގެދޮރު ގެއްލިފައިވާ ކަމަށް ރެސްކިއު އޮފިޝަލުން ބުނެފިއެވެ.
ޕާކިސްތާނުގެ ޕަންޖާބު ޑިޒާސްޓާ މެނޭޖްމަންޓް އޮތޯރިޓީން މިއަދު ނެރުނު ބަޔާނެއްގައި ބުނެފައިވާ ގޮތުގައި ޖޫން މަހުގެ 26 ވަނަ ދުވަހުން ފެށިގެން މޫސުން ގޯސްވެ ޕާކިސްތާނުން 835 މީހުން މަރުވެފައިވާއިރު، ޕަންޖާބު ޕްރޮވިންސުން އެކަނި ވެސް 195 މީހުން މަރުވެފައިވެއެވެ.
އިންޑިއާއާ ޕާކިސްތާނުގުޅޭ ޕާންޖާބު ބޯޑަރު ސަރަހައްދުގައިވާ ޓްރާންސްބައުންޑަރީ ތިން ކޯރެއް އޯވަރފްލޯވެ 2،300 އަށް ވުރެ ގިނަ އަވަށެއްގައި ވަނީ ފެންބޮޑުވެފައެވެ.
ސަރަހައްދީ ޕަންޖާބު ސަރުކާރުން ވަނީ ޗެނަބް، ރަވީ އަދި ސުޓްލޭޖް ކޯރުތަކުން ބޭރުވަމުންދާ ފެންތައް ޑައިވަރޓް ކުރުމަށް ކީ ފްލަޑް ބަންޑްތައް ކޮންޓްރޯލްކޮށް ބްރީޗް ކުރުމުގެ މަސައްކަތް ފަށާފައެވެ. މި ބޮޑު ތިން ކޯރު އެއްފަހަރާ ފުރިގެން މި ދިޔައީ، އެގައުމުގެ ތާރީހުގައި ފުރަތަމަ ފަހަރަށެވެ.
ޕަންޖާބު ސަރުކާރުގެ ރިލީފް ސާވިސަސްގެ ވެރިޔާ، މިއަދު ވިދާޅުވީ ފެންބޮޑުވުމުގެ ސަބަބުން ތާށިވެފައި ތިބި 481،000 މީހުންނާއި އެކު 405،000 ނައަމްސޫފި ރައްކާތެރި ހިސާބުތަކަށް ބަދަލުކޮށްދީފައިވާ ކަމަށެވެ. ޖުމްލަކޮށް ބަލާއިރު، ފެންބޮޑުވުމުގެ ސަބަބުން 1.5 މިލިއަނަށްވުރެ ގިނަ މީހުންނަށް ވަނީ އަސަރުކޮށްފައިކަމަށް އޭނާ ވިދާޅުވިއެވެ. އަދި ފެންބޮޑުވެފައިވާ ސަރަހައްދުތަކުން އާއިލާތައް އިވެކުއޭޓްކުރުމުގައި 800 އަށް ވުރެ ގިނަ ދޯންޏާއި 1،300 ރެސްކިއު ވޯކަރުން ހަރަކާތްތެރިވެފައިވާ ކަމަށާއި އެންމެ ގިނަ މީހުން އިވެކުއޭޓް ކުރަން ޖެހުނީ ބަންޑުންވި ތިން ކޯރުގެ އައްސޭރި ފަށުގައި ހުރި އަވަށްތަކުން ކަމަށްވެސް އޭނާ ވިދާޅުވިއެވެ.
އިވެކުއޭޓްކުރި އާއިލާތަކަށާއި އެމީހުންގެ ނައަމްސޫފިތަކަށް ހިޔާވަހިކަން ފޯރުކޮށްދިނުމަށް 500 އަށް ވުރެ ގިނަ ރިލީފް ކޭމްޕް ޕާކިސްތާނުގައި ވަނީ ގާއިމްކޮށްފައެވެ.
މިއަދުވެސް މެދުކެނޑުމެއް ނެތި ޕާކިސްތާނުގެ އެކި ހިސާބުތަކަށް ވާރޭ ވެހެމުންދާއިރު، އެގައުމުގެ ދެވަނައަށް އެންމެ ބޮޑު ސިޓީ ކަމަށްވާ ލާހޯރުގައިވެސް ގިނަ ގެތައް މިހާރު ހުރީ ދެބައިކުޅަ އެއްބައި ފެނު އަޑީގައެވެ.
(ލާހޯރް ގެ ލަގްޒަރީ ހައުސިން ކޮމްޕެކްސްތަކެއް ހުރި ސަރަޙައްދު އެއްކޮށް ފެނު އަޑީގައި)
ޕާކިސްތާނުގެ މޫސުމާ ބެހޭ އިދާރާއިން ލަފާކުރާ ގޮތުން ކުރިއަށް އޮތް ދުވަސްތަކުގައިވެސް ވެސް އެ ޤައުމުގެ ގިނަ ސަރަހައްދުތަކަކަށް ބޯކޮށް ވާރޭވެހި، ވައިގަދަވާނެއެވެ.
ފާއިތުވީ އޮގަސްޓް މަހުގެ މެދުތެރޭގައި ޕާކިސްތާނުގެ ޚައިބަރު ޕަޚްތުންވާ ސަރަހައްދަށް ބޯކޮށް ވާރޭވެހި ފެންބޮޑުވުމާ ގުޅިގެން ބިންގަނޑު ކަނޑައިގެންގޮސް 400 އަށް ވުރެ ގިނަ މީހުން މަރުވެފައިވެއެވެ.
(އޯގަސްޓް މަހު މެދުތެރޭގައި ޚައިބަރު ޕަޚްތުންވާ ސަރަހައްދުގައި ހިނގި ބިންގަނޑު ކަނޑައިގެން ދިޔުމުގެ ހާދިސާ)
2022 ވަނަ އަހަރު ވެސް ޕާޚިސްތާނަށް ކުރި މޫސުމީ ވިއްސާރައިގައި އެ ޤައުމުގެ 3 ބައިކުޅަ އެއްބައިގައި ފެންބޮޑުވެ ލިބުނު ގެއްލުންތަކުގެ ސަބަބުން އިންސާނީ، އިގްތިޞާދީ އަދި އުމްރާނީ ބޮޑު ކާރިސާއެއް ކުރިމަތިވިއެވެ.