އޭޝިއާ ޕެސިފިކްގެ އެންވަޔަރަންމަންޓް އޮތޯރިޓީތަކާއި މިނިސްޓަރުންގެ ފޯރަމްގެ ހަވަނަ ސެޝަންގެ މިނިސްޓީރިއަލް ސެގްމެންޓްގެ ބިއުރޯގެ ނާއިބު ރައީސްކަމަށް ރާއްޖޭގެ މިނިސްޓަރ އޮފް ޓޫރިޒަމް އެންޑް އެންވަޔަރަމަންޓް ޠާރިޤް އިބްރާހީމް އިންތިޚާބުކޮށްފިއެވެ.
މި މަޤާމަށް މިނިސްޓަރ ޠާރިޤް އިބްރާހީމް އިންތިޚާބުވެފައިވަނީ، މި ސަރަޙައްދުގެ ޤައުމުތަކުން ވޯޓުދީގެންނެވެ. މިއީ ތިމާވެށި ރައްކާތެރިކުރުމާއި، މޫސުމަށް އަންނަ ބަދަލުތަކާ ގުޅިގެން ރާއްޖެއިން ދުނިޔޭގެ މަސްރަޙުގައި ކުރަމުންދާ މަސައްކަތްތަކަށް ލިބުނު ބޮޑު ގަދަރެއް ކަމަށް ފަތުރުވެރިކަމާއި ތިމާވެއްޓާ ބެހޭ ވުޒާރާއިންވަނީ ބުނެފައެވެ.
އޭޝިއާ ޕެސިފިކް ސަރަޙައްދުގެ އެންވަޔަރަންމަންޓް އޮތޯރިޓީތަކާއި މިނިސްޓަރުންގެ މި ފޯރަމަކީ، ސަރަޙައްދީ ތިމާވެށީގެ މައްސަލަތަކަށް ޙައްލު ހޯދުމަށާއި، ދެމެހެއްޓެނިވި ތަރައްޤީއަށް މަގުފަހިކުރުމަށް މަޝްވަރާކޮށް ގޮތްތައް ނިންމާ މުހިއްމު މަންސައެއް ކަމަށާއި މި ފޯރަމްގެ ބިއުރޯގެ ނާއިބު ރައީސްކަމުގެ މަޤާމު ރާއްޖެއަށް ލިބުމަކީ، މި ސަރަޙައްދުގައި ތިމާވެށީގެ ސިޔާސަތުތައް އެކުލަވާލުމާއި، ތިމާވެށި ރައްކާތެރިކުރުމުގެ މަސައްކަތްތަކުގައި ރާއްޖޭގެ ދައުރު އިތުރަށް ފުޅާވެގެންދާނެ ކަމެއް ކަމަށްވެސް އެ ވުޒާރާއިން ވަނީ ބުނެފައެވެ.
އޭޝިއާ-ޕެސިފިކް ވެށި ފޯރަމްގައި، ވާހަކަދައްކަވަމުން މިނިސްޓަރ ޠާރިޤް އިބްރާހީމް ވަނީ މި ސަރަހައްދު ހަމައެކަނި ނާޒުކުކަމުގެ ސަރަހައްދަކަށް ނުވެ، ވެށީގެ ދާއިރާގައި އިސްނަގައި، އެއްބާރުލުމުގެ ރީތި ނަމޫނާއަކަށް ވުމަށް ގޮވާލައްވާފައެވެ.
އެމަނިކުފާނު ވަނީ، ވެއްޓަށް ކުރިމަތިވެފައިވާ ގޮންޖެހުންތަކާ ކުރިމަތިލުމުގައި ސަރަހައްދީ ގޮތުން އެއްބައިވަންތަކަމާއި އެއްބާރުލުން އިތުރުކުރުމުގެ މުހިންމުކަން ފާހަގަކުރައްވާފައެވެ.
އެމަނިކުފާނު އިތުރަށް ވިދާޅުވީ، އޭޝިއާ-ޕެސިފިކް ސަރަހައްދަކީ މޫސުމީ ބަދަލުތަކުގެ ސަބަބުން ނާޒުކުކަން ބޮޑު ސަރަހައްދެއް ކަމުގައި ވީނަމަވެސް، ވެށީގެ ދާއިރާގައި ބަދަލުތައް ގެނެސް، އިސްނަގައި، އެހެން ޤައުމުތަކަށް ނަމޫނާ ދެއްކުމުގެ ޤާބިލުކަން އެބައޮތް ކަމަށެވެ. އެހެންކަމުން، ގުޅިގެން މަސައްކަތްކޮށް، ހައްލުތަކަށް މަގުފަހިކުރުމަށް ވަނީ ގޮވާލައްވާފައެވެ.
މި ފޯރަމްގެ ހަވާސާގައި، ވަޒީރު ޠާރިޤު، ދިވެހިރާއްޖެއާއި އދ. ގެ ތިމާވެށީގެ ޕްރޮގްރާމް (ޔޫ.އެން.އީ.ޕީ) އާ ގުޅިގެން ކުރިއަށްގެންދާނެ އާ މަޝްރޫޢެއް ރަސްމީކޮށް ފައްޓަވާފައިވާކަންވެސް ވަނީ އިއުލާންކުރައްވާފައެވެ.
މިއީ ގްރީން ކްލައިމެޓް ފަންޑު (ޖީ.ސީ.އެފް) އިން މުޅިން އަލަށް ފާސްކުރައްވާފައިވާ 25 މިލިއަން އެމެރިކާ ޑޮލަރުގެ ހިލޭ އެހީގެ މަޝްރޫޢެކެވެ. މި މަޝްރޫޢުގެ ނަމަކީ 'ޓުވާޑް ރިސްކް-އެވެއަރ އެންޑް ކްލައިމެޓް-ރެޒިލިއަންޓް ކޮމިއުނިޓީސް (ޓްރެކްޓް)' އެވެ. މި މަޝްރޫޢު ރަސްމީކޮށް ފެށުމާއެކު، ދިވެހިރާއްޖޭގެ މުޖުތަމަޢުތައް ތިމާވެށީގެ ގޮންޖެހުންތަކާ ކުރިމަތިލާން ތައްޔާރުކުރުމަށް ބޮޑު ބާރެއް ލިބިގެންދާނެއެވެ. މި މަޝްރޫޢުގެ މައިގަނޑު މަޤްސަދަކީ، ދިވެހިރާއްޖޭގެ ރަށްރަށުގެ މުޖުތަމަޢުތަކަކީ ތިމާވެށީގެ ނުރައްކާތަކަށް ހޭލުންތެރި، އަދި މޫސުމީ ބަދަލުތަކާ ކުރިމަތިލާން ތައްޔާރުވެފައިވާ ބަޔަކަށް ހެދުމެވެ.
މި މަސައްކަތުގެ ސަބަބުން ދިވެހިރާއްޖެއަށް ކުރިމަތިވަމުންދާ މޫސުމީ ބަދަލުތަކުގެ ގޮންޖެހުންތަކުން އަރައިގަތުމަށް ބޮޑު އެހީތެރިކަމެއް ލިބިގެންދާނެއެވެ. ޚާއްސަކޮށް، ރަށްރަށުގެ ރައްޔިތުންނަށް ތިމާވެށީގެ ނުރައްކާތަކާބެހޭ މައުލޫމާތު ދީ، އެކަންކަމުން ރައްކާތެރިވުމަށް ބޭނުންވާ ގާބިލިއްޔަތުކަން އިތުރުކުރުމަށް މި މަޝްރޫޢުން އެހީތެރިވެދޭނެއެވެ.