މެލޭޝިއާއިން ދިވެހި ފިރިހެނަކު ހައްޔަރުކޮށްފިއެވެ. ހައްޔަރުކޮށްފައިވަނީ މާލެ' ފްލެޓް ނަންބަރު 08-03-60، އުމުރުން 28 އަހަރުގެ ޢަބްދުލް ބާތިން މުޙައްމަދު މުޞްޠަފާއެވެ.
ދިވެހި ފުލުހުންގެ ޚިދުމަތުން ވަނީ މިކަން ކަށަވަރުކޮށްދީފައެވެ. އެގޮތުން ފުލުހުން ބުނެފައިވަނީ މެލޭޝިއާ ފުލުހުން ތަހުގީގު ކުރަމުންދާ މައްސަލައަކާ ގުޅިގެން ބާތިން ހައްޔަރުކޮށްފައިވާކަމުގެ މަޢުލޫމާތު ދިވެހި ފުލުހުންގެ ޚިދުމަތަށް ލިބިފައިވާކަމަށެވެ.
މެލޭޝިއާ ފުލުހުން ބަލަމުންދާ މައްސަލައަކީ ކޮންކަމަކާ ގުޅޭ މައްސަލައެއްކަމެއް ފުލހުން ހާމަކޮށްފައެއް ނުވެއެވެ. ނަމަވެސް އޭނާގެ މައްޗަށް ތުހުމަތު ކުރެވޭ ގެވެށި އަނިޔާގެ މައްސަލައެއް ދިވެހި ފުލހުންގެ ޚިދުމަތުންވެސް ތަހުގީގުކުރަމުންދާކަމަށް ފުލުހުންވަނީ މިއަދު ހާމަކޮށްފައެވެ.