އެންމެނަށް އެގޭ ގޮތުން އެއީ މަޝްހޫރު ވިޔަފާރި ވެރިއެކެވެ. ނަމަކަށް ކިޔަނީ ކޮލި މޮހޮދޭ ނުވަތަ އެމްޔޫ އުމަރު މަނިކުއެވެ. ރާއްޖޭގެ ފަތުރުވެރިކަން ކޮޅަޖަހާ އެންމެ ފަހު ވިންދާ ހަމަޔަށް ފަތުރުވެރިކަމުން ދިވެހިންނަށް ނަފާ ހޯދުމުގައި ގިނަ މަސައްކަތްތަކެއް ކޮށްފައިވާ ބާނީ އަކީވެސް ކޮލި މޮހޮދޭ ނުވަތަ އެމްޔޫ އުމަރު މަނިކުއޭ ބުނުމަކުން ދޮގަކަށް ނުވާނެއެވެ. އޭނާގެ އުމުރުގެ ބޮޑު ބަޔެއް ހޭދަކުރެއްވީ ގައުމަކަށް އެންމެ ފައިދާވާ ސިނާއަތް ކުރިއަރުވާ އަދި އެ ސިނާއަތުން ބަޔަކު އުފެއްދުމަށެވެ. 50 އަހަރުވެފައިވާ ފަތުރުވެރިކަމުގެ ސިނާއަތުގެ މިއަދު ބާނީ އަކީ އެމްޔޫ އުމަރު މަނިކެވެ. .
ފަތުރުވެރިކަމުގެ ސިނާއަތު ތައާރަފުކުރުމާއި މިއަދު ފަތުރުވެރިކަން މިހިސާބަށް ގެނައުމުގެ މަސައްކަތުގެ އެންމެ އިސް މޭސްތިރިންގެ ތެރެއިން އޭނާ ފާހަގަވެގެދަނީ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ، މަޓީ ގެ ޗެއަރމަންކަމާއި ހަމަޔަކުންވެސް ނޫނެވެ. ތައުލިމަށްފަހު ރާއްޖެ ވަޑައިގެން ފުރަތަމަ މަސައްކަތަށް ނުކުންނެވި ހިސާބުން ފެށިގެންނެވެ.
މަޝްހޫރު ވިޔަފާރިވެރިޔާ ކޮލި މޮހޮދޭ ދިރިއުޅުމާއި އޭނާ ގައުމަށް ކޮށްދެއްވި ހިދުމަތް އޮތީ ތާއަބަދަށް ފެންނާށެވެ. އެއީ ފަޑުވުމެއް ނެތް ހަނދާންތަކެކެވެ. މާޒީއާއި އެކު ވެސް އާލާވެވޭނެ ފަދަ ގައުމީ ހިދުމަތެކެވެ. ހާލު ދެރަވެ އައިސީޔޫގައި ފަރުވާ ދެމުންދަނިކޮށް އޭނާ އަވަހާރަވުން ވެގެންދިޔައީ އެތައްބަޔެއްގެ ހިތްތަކަށް ފުން އަސަރުކުރުވާ ކަމަކަށެވެ. މިދުނިޔެއާއި އަލްވަދާއުކީ ނަމަވެސް އެ ހަނދާން އާކޮށް ލޯތްބާއި އެކު ސިނާއަތަކަށް ތާއަބަދު ސަނާކިޔާނެ ބަޔަކު ވަނީ އުފައްދާފައެވެ. އޭނާގެ ހިދުމަތް އޮތީ ދިރިދިރިއެވެ. އޭނާގެ ހިދުމަތުން ގައުމު ކޮޅަށްޖެހުނު އިރު ބައިގަރުނުގެ މާޒީން ވަނީ އިބްރަތްތެރި އެތަކެއް ފިލާވަޅުތައް މާޒީގެ ސަފްހާތަކާއެކު ވެފައެވެ. އަސަރާއެކު އެތައްބަޔެއްގެ ހިތް މިއަދު ރޮއްވާލި ނަމަވެސް އެނާގެ ހިދުމަތް ވަނީ އުފާވެރިކަމުގެ މާބަގީޗާގެ ފޮޅިފައެވެ. ހިދުމަތަކަށްފަހު ހިދުމަތަކުން ގައުމު ބިނާކުރުމުގައި އޭނާގެ ދައުރު ނުހަނު ބޮޑުއިރު، ގައުމަށް އޭނާ ކޮށްދެއްވި އަގުނުކުރެވޭ ހިދުމަތް އޮތީ ދިވެހިންގެ ވިންދާ ވެސް ގުޅިލާމެހިފައެވެ.
މުހައްމަދު އުމަރު މަނިކު ސަރުކާރަށް ވެސް ވަނީ ގިނަދުވަހު މަސައްކަތް ކުރައްވާފައެވެ. އެގޮތުން ރައީސް މައުމޫނުގެ ސަރުކާރުގައި މިނިސްޓްރީ އޮފް އެގްރިކަލްޗަރގެ ނައިބު ގޮތުގައި މަސައްކަތް ކުރެއްވިއެވެ. ސަރުކާރުގެ އިސްސަފުގައި މަސައްކަތް ކޮށް ރިޓެއާރ ކުރެއްވުމާ ހަމަޔަށް ހުންނެވީ އެގޮތުގައެވެ.
މަރުކަޒީ ބޭންކު، އެމްއެމްއޭގެ ޑިރެކްޓަރުންގެ ބޯޑުގައި މަސައްކަތްކުރެއްވުމުގެ އިތުރުން، އައިލެންޑް އޭވިއޭޝަންގެ ޗެއާމަންކަންވެސް ވަނީ ކުރައްވާފައެވެ. އަދި އެމްއޭސީއެލްގެ ޗެއާމަންކަން 2013 އިން 2024 ގެ ޖެނުއަރީއާ ހަމައަށް ވަނީ ކުރައްވާފައެވެ. މިއަދުވެސް ރާއްޖޭގެ އެންމެ ބޮޑު އެއް ވިޔަފާރި ކުންފުނި ކަމަށްވާ ޔުނިވާސަލް އެންޓަޕްރައިސަސްގެ ބާނީ އަކީވެސް އެމްޔޫ އުމަރުމަނިކެވެ.
އެބޭފުޅާގެ ހިދުމަތް ފެށުނު ގޮތަށްބަލާއިރު 1972 ވަނަ އަހަރުން ފެށިގެން މެދުކެނޑުމެއްނެތި ދިވެހިންގެ ރަންބިސް އަޅާ ކުކުޅު ބޮޑު ކޮށް އެ މަސައްކަތް ދިރުވާ އާލާ ކުރެއްވީ ހިތުން ރުހުމުން ގަބޫލުވެ ޝައުގާއި ފަންނުގެ ބޭނުން ހެޔޮގޮތުގައި ހިފައިގެންނެވެ. އޭނާގެ މަސައްކަތާއި ތައާރަފަށް ޖެހިލާއިރުވެސް އޭނާ ހުނަރާއި ގާބިލް ކަން ދައްކުވައިދެނީ ސާބިތުކަމާއި އަޒުމެވެ. ކިޔަވައި ވިދާޅުވެގެން އެނބުރި ރާއްޖެ ވަޑައިގެންނެވިތާ ގިނަ ދުވަސްތަކެއް ނުވަނީސް އޭނާ ވަނީ ތައުލީމް ހާސިލްކުރެއްވި ދާއިރާއިން ޝައުގާއި ހުނަރުން މަސައްކަތްކޮށްފައެވެ.
ރާއްޖޭގައި ފުރަތަމަ ހުޅުވި 30 ކޮޓަރީގެ ޓޫރިސްޓް ރިޒޯޓަކީ، އޭނާގެ ރިޒޯޓްއެވެ. ކުރުނބާ ވިލެޖްގެ ނަމުގައި އެ ރިޒޯޓް 1986 ގައި އަލުން ތަރައްގީކުރައްވައި ރާއްޖޭގެ ފުރަތަމަ ފަސް ތަރީގެ ހޮޓަލަކަށް ހެއްދެވުމުގައި އެމްޔޫ މަނިކު މުހިންމު ދައުރެއް އަދާކޮށްފަވެއެވެ. 1992 ވަނަ އަހަރު މަޓީ އުފެއްދުމާއި ހަމައިން ރާއްޖޭގައި ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ އެއްބާރުލުން އިތުރުކުރައްވާ އެ މަސައްކަތްވެސް އަދާހަމަޔަށް ވަނީ ފޯރުކޮށްދެއްވާފައެވެ. ފަތުރުވެރިކަމުގެ ދާއިރާއިން ކުރައްވާފައިވާ އަގުހުރި ހިދުމަތްތަކަށްޓަކައި 1982 ވަނަ އަހަރު އާންމު ހިދުމަތުގެ ހިތްވަރު ދިނުމުގެ އިނާމާއި 2002 ވަނަ އަހަރު ޝަރަފުވެރިކަމުގެ އިނާމު ވެސް އެމްޔޫ އުމަރު މަނިކް ވަނީ ހާސިލްކުރައްވާފައެވެ.
މިއަދާ ހަމައަށް ވެސް އެމްޔޫ މަނިކަކީ ރާއްޖޭގައި އެންމެ ގިނަ ޓޫރިސްޓް ރިސޯޓްތައް ހިންގަވަމުންގެންދަވާ އެއް އެއްފަރާތެވެ. ދިވެހިންގެ ފަތުރުވެރިކަމުގެ ސިނާއަތުގެ މޭސްތިޔާ ވެސްމެއެވެ.